मयत-सुदर्शन राठोड
लोक न्यूज-
नेहमीच आजारी असलेला मुलगा बरा व्हावा म्हणून गावातीलच १० वर्षांच्या बालकाला शेतात जेवणाला बोलावून त्याला धरणात बुडवत तरफडून जीव घेणार्‍या १६ हैवानांवर अखेर खुनाचा गुन्हा दाखल करण्यात आला आहे. डांगर बु. येथे अंगाचा थरकाप उडविणार्‍या या नरबळीच्या घटनेने खळबळ उडाली होती. पण पोलिसांनी दाद न दिल्याने अखेर न्यायालयाचा दरवाजा ठोठावल्याने एका वर्षांनी गुन्हा दाखल झाला आहे.
अमळनेर तालुक्यातील डांगर बु. येथील इंदल हिरामण चव्हाण यांचा मुलगा झिंग्या हा नेहमी आजारी राहत होता. त्यामुळे मुलगा बरा व्हावा म्हणून इंदल याने जादूटोण्यावर विश्वास ठेवून हे अघोरी कृत्य करण्यासाठी शेतात चावदस निमित्त ७ एप्रिल २०२० रोजी डाळ बट्टीच्या जेवणाचा कार्यक्रम ठेवला होता. या जेवणासाठी त्यांनी गावातील सुभाष बसराज राठोड (वय ३९) यांचा मुलगा सुदर्शन सुभाष राठोड (वय १०) याला निमंत्रण दिले होते. त्यानंतर त्याला बोलावून घेण्यासाठी झिंग्याला पाठवले होते. तो सुदर्शन याला घरून बोलावून घेऊन गेला.
त्यानंतर सुदर्शन याच्या कपाळावर टिळा लावून गळ्यात मिरची, लिंबू घालून सुदर्शन रोहिदास चव्हाण यांच्या शेताजवळील धरणात घेऊन गेले. यावेळी येथे इतर १६ जण ही उपस्थित होते. त्यांनी सुदर्शन याला धरणाच्या पाण्यात नेऊन तोंड धरून बुडवून त्याचा नरबळी दिला. हा चिमुरडा जिवाच्या आकांताने तरफडत होता. परंतु त्यातील एकालाही त्याची कीव आली नाही उलट नरबळी दिल्याचे समाधान मानून अघोरी कृत्य केले. मुलाचा नरबळी दिल्याने सुभाष बसराज राठोड यांनी पोलिसात धाव घेतली मात्र त्यांना दाद मिळाली नाही अखेर न्यायालयाचा दरवाजा ठोठावत गुन्हा दाखल करण्याची मागणी केली. न्यायालयाने न्याय देत पोलिसांना गुन्हा दाखल करण्याचे आदेश दिल्या नंतर ९ मार्च रोजी १६ आरोपींवर भादवी कलम ३०२,१२० ब,३४ प्रमाणे
खुनाचा गुन्हा दाखल करण्यात आला आहे. पुढील तपास पोलीस उपनिरीक्षक गंभिर शिंदे करीत आहेत.
नरबळी घेणारे डांगर येथील नराधम असे
आरोपी रोहिदास हिरामण चव्हाण, मनीराम हिरामण चव्हाण, इंदल हिरामण चव्हाण, योगेश मनीराम चव्हाण, रामसिंग नंदा चव्हाण, दादू रोहिदास चव्हाण, निलेश रोहिदास चव्हाण, सोनी रोहिदास चव्हाण, निकिता इंदल चव्हाण, चंद्रकला मनीराम चव्हाण, तुळसाबाई रोहिदास चव्हाण, भारती इंदल चव्हाण, ताई रामसिंग चव्हाण, शंकर रामसिंग चव्हाण, नवसाबाई हिरामन चव्हाण (सर्व रा. डांगर) आणि ज्ञानेश्वर चव्हाण (रा. रणाईचे) असे सुदर्शनचा बळी घेणारे आरोपी आहेत.