अमळनेर (जळगाव) :
शहरातील मुख्य मार्गांपैकी एक असलेल्या भद्रा प्रतीक मॉल ते बजरंग पेट्रोल पंप या दरम्यानचा रस्ता सध्या खड्ड्यांनी व्यापलेला असून, वाहनचालक व नागरिक यांना मोठ्या गैरसोयींचा सामना करावा लागत आहे. सार्वजनिक बांधकाम विभागाच्या (PWD) निष्काळजीपणामुळे या भागातील रस्त्यांची अवस्था अत्यंत दयनीय झाली आहे.
सततचा पाऊस आणि योग्य देखभालीअभावी रस्त्यात मोठमोठे खड्डे पडले आहेत. त्यामुळे दुचाकीस्वारांना तोल जाऊन अपघात होण्याचा धोका वाढला आहे. अनेक वाहनचालकांनी सोशल मीडियावर आणि स्थानिक प्रशासनाकडे तक्रारी दाखल केल्या आहेत, परंतु अद्याप कोणतीही ठोस कारवाई झालेली नाही.
नागरिकांनी उचलली पुढाकार:
सततच्या निष्काळजीपणामुळे संतापलेल्या स्थानिक नागरिकांनी स्वतःहून रस्त्यावर बॅरिकेट लावून वाहनचालकांना सतर्क राहण्याचे आवाहन केले आहे. काही ठिकाणी नागरिकांनी स्वतःच मुरूम टाकून खड्डे बुजवण्याचाही प्रयत्न केला.
तात्काळ दखल घेण्याची मागणी:
नागरिकांनी सार्वजनिक बांधकाम विभागाला तात्काळ दखल घेऊन रस्त्यांची दुरुस्ती करण्याची मागणी केली आहे.
वाहनचालकांचा संताप:
“हा रस्ता शहरातील प्रमुख मार्ग असून दररोज शेकडो वाहनांची वर्दळ असते. खड्ड्यांमुळे अपघात होण्याची शक्यता कायम असते, पण PWD मात्र डोळेझाक करत आहे,” असे एका स्थानिक नागरिकाने सांगितले.
प्रशासनाकडून प्रतिसादाची अपेक्षा:
या गंभीर परिस्थितीकडे लक्ष देऊन सार्वजनिक बांधकाम विभागाने तातडीने रस्त्याची दुरुस्ती सुरू करावी, अशी मागणी सर्वसामान्य नागरिकांकडून केली जात आहे.