अमळनेरमध्ये निवडणुकीच्या तोंडावर राजकीय वातावरण तापू लागले आहे. प्रभागनिहाय उमेदवार निश्चितीच्या हालचालींना वेग आला असतानाच, “ज्याच्याकडे पैसा त्याच्याकडे उमेदवारी” अशी चर्चा जनतेत जोर पकडत आहे. ही चर्चा केवळ अफवा म्हणून दुर्लक्ष करता येणार नाही, कारण आज सर्वच पक्षांमध्ये पैशाची ताकद हा निर्णायक घटक ठरू लागला आहे.
राष्ट्रवादी काँग्रेस (अजितदादा गट) असो वा शिवसेना (शिंदे गट), भाजप असो वा इतर स्थानिक पॅनेल — सर्वत्र एकच चित्र दिसते आहे. पक्षांतर्गत चाचपणी सुरू असली तरी उमेदवारीच्या शर्यतीत आर्थिक पाठबळ असलेले उमेदवार आघाडीवर आहेत. स्थानिक कार्यकर्ते, ज्यांनी वर्षानुवर्षे पक्षासाठी काम केले, त्यांच्याकडे दुर्लक्ष होत असल्याची भावना तळागाळात निर्माण होत आहे.
शिवसेना शिंदे गटाचे शिरीष दादा चौधरी आणि राष्ट्रवादी अजितदादा गटाचे अनिल दादा पाटील या दोघांसमोरही मोठे आव्हान उभे आहे. एकीकडे निष्ठावंत कार्यकर्त्यांना न्याय द्यायचा, तर दुसरीकडे जिंकणाऱ्या उमेदवाराची निवड करायची — हे संतुलन साधणे सोपे नाही. पण प्रश्न असा आहे की, जिंकण्याच्या आकांक्षेपुढे जनतेचा विश्वास आणि कार्यकर्त्यांचा आत्मसन्मान बळी जाणार का?
प्रभागनिहाय उमेदवार ठरवताना केवळ पैशाचा विचार न करता, त्या भागातील जनतेशी असलेले नाते, सामाजिक योगदान, आणि स्थानिक समस्यांवर काम करण्याची तयारी या बाबी लक्षात घेणे आवश्यक आहे. अन्यथा निवडणुकीनंतर पुन्हा एकदा जनतेला “आपल्याला फसवले गेले” अशी भावना होईल.
आज अमळनेरकरांना हवा आहे तो विकासाभिमुख नेता — जो निवडणुकीनंतरही जनतेच्या दारी दिसेल, जनतेचा आवाज बनेल. पैशाच्या जोरावर उभे राहिलेले उमेदवार केवळ राजकारणातील व्यवहार पूर्ण करतात, पण लोकशाहीचे मर्म हरवतात.
राजकारणात पैसा महत्त्वाचा घटक असला तरी, तोच निर्णायक होऊ लागला तर लोकशाहीच्या मुळावर घाव बसतो. अमळनेरमधील मतदार या वेळी विचारपूर्वक निर्णय घेतल्यास, ‘धनशक्ती’पेक्षा ‘जनशक्ती’ जिंकू शकते.
लोक न्यूज,संपादक
संभाजी देवरे
