स्थानिकांच्या म्हणण्यानुसार, काही ठिकाणी दिवसाढवळ्या गावठी दारूची विक्री सुरू असते. इतकेच नव्हे तर काही भागांमध्ये दारू तयार करण्याचे अड्डेही सुरू असल्याची चर्चा आहे. या धंद्यामुळे परिसरातील अनेक कुटुंबे आर्थिक संकटात सापडत आहेत. घरातील पुरुष दारूच्या आहारी गेल्याने कुटुंबातील महिलांना व मुलांना प्रचंड हाल सहन करावे लागत आहेत.
गावातील महिलांनी या प्रकाराबाबत तीव्र नाराजी व्यक्त केली आहे. “घर चालवण्यासाठी दिवसभर मजुरी करावी लागते, पण पुरुष कमावलेले पैसे दारूत उडवतात. त्यामुळे घरात भांडणे, मारहाण आणि उपासमारीची वेळ येते,” अशी व्यथा काही महिलांनी व्यक्त केली.
या अवैध दारू विक्रीमुळे तरुण पिढीही मोठ्या प्रमाणावर व्यसनाच्या गर्तेत ओढली जात असल्याची चिंता व्यक्त केली जात आहे. शिक्षण, रोजगार आणि भविष्य याकडे लक्ष देण्याऐवजी काही तरुण दारूच्या आहारी जात असल्याने समाजात गंभीर परिस्थिती निर्माण होत आहे.
दरम्यान, एवढ्या मोठ्या प्रमाणावर सुरू असलेल्या गावठी दारूच्या धंद्याकडे मारवड पोलीस स्टेशन प्रशासनाने अद्याप ठोस कारवाई का केली नाही, असा सवाल नागरिक उपस्थित करत आहेत. काही नागरिकांच्या मते, या अवैध धंद्याला कुणाचे तरी पाठबळ असल्याचीही कुजबुज परिसरात सुरू आहे.
या पार्श्वभूमीवर जिल्हा पोलीस प्रशासनाने या प्रकरणाची तातडीने चौकशी करून मारवड पोलीस स्टेशन हद्दीत सुरू असलेल्या गावठी दारूच्या अवैध धंद्यावर कठोर कारवाई करावी, अशी जोरदार मागणी स्थानिक नागरिकांकडून होत आहे.